१.
येता तुझ्या किनारी लाटांकडे बघू
नंतर स्थिरावलेल्या क्षितिजांकडे बघू
दिसते पुढे तसे ते नसते कधी कधी
शोधायला खरे मग भासांकडे बघू
एकेक वर्ष जगलो काही क्षणांमधे
आता कशास फिरत्या काट्यांकडे बघू?
उशिरा परंतु उत्तम मिळतात माणसे
मग वाटते नव्याने नात्यांकडे बघू
उरलाय प्रश्न एकच दर्शन करूनही
डोळ्यांकडे बघू की चरणांकडे बघू?
२.
कोणती स्वप्ने कुणी पाहायची
हे कळेस्तोवर जवानी जायची
एक मूर्ती कोरली स्वप्नामधे
ती मनापासुन मला बोलायची
वृद्धपण दुसरे असावे बालपण
वेळ असते एकटे खेळायची
दाखवू नाही शकत साधेपणा
सवय नाही वेगळे वागायची
एकही मोफत मिळत नसते क्षमा
आपली किंमत जगी घसरायची
भ्याडपण सोयीप्रमाणे पांघरू
सवय जडली भांडणे टाळायची
३.
वेदनांची आठवण आली पुन्हा
आठवांची वेदना झाली पुन्हा
मोह वाड्यावर कुणाचा राहिला?
वाढल्या भिंतीवरी पाली पुन्हा
घेतली नव्हती दखल समजू नको
एकदा रेंगाळ भवताली पुन्हा
कळत नाही मित्र कोणाला म्हणू?
भासतो सुग्रीव हा वाली पुन्हा!
पाय नवऱ्यावर उगा ठेवू नको
व्हायचे झालेच जर काली पुन्हा
वैर संपेना कधी मरणामुळे
प्रेत खेळू लागले चाली पुन्हा
.............................................
No comments:
Post a Comment